Tshekaseko ya sebopego, tsweletso le mehola ya dikosatshaba tsa Sesotho sa Leboa (An investigation of the structure, performance and significance of Northern Sotho folksongs)

Abstract

Maikemišetšo a nyakišišo ye ke go maatlafatša Seafrika go Basotho ba Leboa gore ba be le boitshepho setšong sa bona. Ba eletšwa go phethagatša ditumelo tša sebona kantle le pelaelo goba boinyatši. Nyakišišo ye e fa tlhalošo ye e tseneletšego ka ga dikošatšhaba tša Sesotho sa Leboa, fao monyakišiši a laetšago gore dikošatšhaba tša sebona di bohlokwa go bona go feta tša ditšhaba tše dingwe, ka ge dikošatšhaba tša bona di rwele motheo wa setšo sa bona. Nyakišišo ye e ithekgile ka setlwaedi sa sebopego sa bomolomo go tšwa go Parry (1930), se thušana le setlwaedi sa kgokagano ka mohlobo le setlwaedi sa tirišongwalwa. Nyakišišo e phethagaditšwe ka tšhomišo ya mokgwaboleng wo o matlafaditšwego ke mekgwatlhaolo ya bakgathatema ye mebedi, e lego; tlhaolokgonagalo ya mokgwa wa sebokuboku le tlhaolotebanyi ya mokgwataeletšo. Go šomišitšwe mekgwa ye meraro ya kgoboketšo ya tshedimošo, e lego; phatadiganong, pogelo, le dingwalwa. Temogo e bile ya gore dikošatšhaba tša Sesotho sa Leboa ga di hwetše thekgo gabotse go tšwa go beng ba tšona. Nyakišišo e hlatholotše tšeo di latelago ka dikošatšhaba tša Basotho ba Leboa; mehuta, tšweletšo, sebopego gammogo le mehola ya tšona setšhabeng. Go lota dikošatšhaba pukung go tla thuša gore le meloko yeo e sa tlago e be le lesedi le tsebo ka ga dikošatšhaba tša sebona, ka ge kgonagalo ya gore di timelele e letše le tlhakahlakano ye e bago gona ya merafe mo nageng ya Afrika-Borwa. MAREO: Setšo, Setšhaba, Dikošatšhaba, Sebopego, Tšweletšo, Mohola