Abstract:
Ṱhoḓisiso iyi yo sengulusa u tambudzwa ha vhana kha maṅwalwa a Tshivenḓa. U tambudzwa ha vhana a zwo ngo thoma ṋamusi nahone ndi zwithu zwi sa ṱanganedzei kha tshitshavha, tshi tou vha tshilonda tshine na u phuphwa tshi sa fhole kana yone tsilingwane. Kha ngudo iyi ho senguluswa u tambudzwa ha vhana nga nḓila dzo fhambanaho, zwi ṱuṱuwedzaho u tambudza vhana, masianditwa a u tambudzwa na zwiga tsumba zwa u tambudzwa ha vhana.
Mawanwa o sumba uri vhana vha a tambudzwa lwa muhumbulo, u tambudzwa ha vhuvha na u tambudzwa nga u sa londwa kha bugu dzo topolwaho. Ṱhoḓisiso iyi yo wana uri vhana vha tambudzwaho lwa muhumbulo, nga u sa londwa na u tambudzwa lwa vhuvha vha lingedza nga nḓila dzoṱhe u shavha hayani, vha a ṱoḓa na u ḓivhulaha, vha dzula vho bilufhala na mashumele avho zwikoloni a a tsela fhasi ane a sa vhe maitele avhuḓi. Mawanwa o dovha hafhu a sumba uri vhatambudzi vha ṱuṱuwedzwa zwihulu nga matiitii, u sa ḓithonifha, u sa dzhiela nṱha pfunzo dza vhana na u nambatela kha mvelele
U ḓimbadekanya na vhana nga vhabebi, u ḓivhadza vhashumelavhapo na tshipholisa nga ha nyeṱe iyi zwi nga khwiṋifhadza mashumele a vhana zwikoloni na u fhungudza u shavha mahayani na u ṱoḓa u ḓivhulaha ha vhana vhane vha khou tambudzwa nga nḓila dzo fhambanaho.
Ngudo iyi yo shumisa maṅwalwa o tou topolwaho u kuvhanganya mafhungo nga ha u tambudzwa ha vhana. Mawanwa o saukanyiwa hu tshi tevhelwa thero dzi fanaho kha maṅwalwa oṱhe. Zwinzhi zwi kha ḓi tea u itwa u itela u thivhela nyeṱe iyi.Themendelo dza mawanwa dzo itwa u itela u thivhela khombo.
